Yas-O-Hiras-O-Jaur-O-Jafa Se Alag-Thalag

Rahi Fidai

yas-o-hiras-o-jaur-o-jafa se alag-thalag

ik sa.eban hai qahr-e-ḳhuda se alag-thalag

dekho uTha hai vo bhi alamat ke taur par

dast-e-daraz dast-e-dua se alag-thalag

parvana-e-hava-o-havas haan bara.e-shauq

koi maqam sham-e-vafa se alag-thalag

kab tak rahega vahshi-e-ehsas-o-agahi

na-sazgar ab-o-hava se alag-thalag

mil ja.ega hisar-e-azimat ke aas paas

karb-e-sukut ah-o-buka se alag-thalag

sad-hadsat-e-ḳham hain ibrat-nigah men

tariḳh-saz jurm-o-saza se alag-thalag

is ḳhauf se na sehr-bayani pe harf aa.e

‘rahi’ rahe hain chun-o-chara se alag-thalag