baanT kar ham ne zauq-e-bina.i
raushni shahr shahr phaila.i
tham ga.e ashk chhup ga.e taare
ho ga.i chand ki pazira.i
tujh se milne zarur a.unga
koi surat agar nazar aa.i
aur kuchh der saath rahna tha
ai miri jur.at-e-shakeba.i
tere aane ka shukriya lekin
mujh ko raas aa ga.i hai tanha.i
ek hi qadr-e-mushtarak hai bahut
tu bhi harja.i main bhi harja.i
Duub kar bahr-e-ishq men ‘nusrat’
marne valon ne zindagi paa.i
Leave a Reply