Talib Baghpati
ḳhud tark-e-mudda.a par majbur ho gaya huun
taqdir ke likhe se ma.azur ho gaya huun
apni ḳhudi ki dhun men mansur ho gaya huun
ḳhud ban gaya huun jalva ḳhud tuur ho gaya huun
un ko bhula raha huun vo yaad aa rahe hain
kis darja dil ke hathon majbur ho gaya huun
sab miT ga.iin umiden sab pis ga.iin umangen
dil ki shikastagi se ḳhud chor ho gaya huun
pachhta raha huun un ko furqat men yaad kar ke
vo paas aa ga.e hain main duur ho gaya huun
mayus ho chuka huun ummid ki jhalak se
main jabr karte karte majbur ho gaya huun
‘talib’ shikast-e-dil ki ik aḳhiri sada par
duniya samajh rahi hai mansur ho gaya huun
Leave a Reply