Arshad Abdul Hamid
nazar men sulh bhi sar par lahu bhi dekhta hai
mujhe to rashk se mera adu bhi dekhta hai
main shorishon men bhi dil ko qarib rakhta huun
yahi to hai jo pas-e-hav-hu bhi dekhta hai
charagh unhin ki visatat se jal raha hai magar
kabhi havaon ko ye tund-ḳhu bhi dekhta hai
mujhe ye moti samundar yuun hi nahin deta
vo mere hausle bhi justuju bhi dekhta hai
ye dil asiir tire naqsh-e-pa ka hai lekin
jo chuuk jaa.e to phir char-su bhi dekhta hai
mire junun ko donon aziiz hain janan
ye dasht-o-dar hi nahin aabju bhi dekhta hai
hazar barg-o-samar jam.a ho ga.e ‘arshad’
magar ye dil ki ma.al-e-numu bhi dekhta hai
Leave a Reply