phunk denge mire andar ke ujale mujh ko
kaash dushman mira qindil bana le mujh ko
ek saaya huun main halat ki divar men qaid
koi suraj ki kiran aa ke nikale mujh ko
apni hasti ka kuchh ehsas to ho jaae mujhe
aur nahin kuchh to koi maar hi daale mujh ko
main samundar huun kahin duub na jaun khud men
ab koi mauj kinare pe uchhale mujh ko
tishnagi meri musallam hai magar jaane kyuun
log de dete hain tuute hue pyale mujh ko
Leave a Reply