har samt rang-o-nur ka dariya dikha.i de
har mauj-e-rang men tira chehra dikha.i de
har aa.ine men tera sarapa dikha.i de
koi to is jahan men apna dikha.i de
tai kis tarah ho jada-e-nairang-e-arzu
har gaam tera naqsh-e-kaf-e-pa dikha.i de
kirnen gurez-pa hain to ḳhushbu bahana-ju
ai kaash koi apna shanasa dikha.i de
ik daman-e-nazar ki bachana muhal hai
ik sho.ala-e-badan ki lapakta dikha.i de
duniya-e-rang-o-nur bahut be-karan sahi
pesh-e-nazar jo tu hai to phir kya dikha.i de
Leave a Reply