Sahar Ansari
man ke mandir men hai udasi kyuun
nahin aa.i vo dev-dasi kyuun
abr barsa baras ke khul bhi gaya
rah ga.i phir zamin pyasi kyuun
ik ḳhushi ka ḳhayal aate hi
chha ga.i zehn par udasi kyuun
zindagi bevafa azal se hai
phir bhi lagti hai ba-vafa si kyuun
aisi fitrat-shikar-duniya men
itni insan-na-shanasi kyuun
kyuun nahin ek zahir-o-batin
aadmi ho ga.e siyasi kyuun
gham-gusari ḳhulus mehr-o-vafa
ho ga.e hain ye phuul baasi kyuun
ik haqiqat hai jab vatan ki talab
phir mohabbat karen qayasi kyuun
ye mulaqat ye sukut ye shaam
ibtida men ye intiha si kyuun
milne vaale bichhaḌ bhi sakte hain
teri ankhon men ye udasi kyuun
Leave a Reply