Chashm-E-Bina Ho to Qaid-E-Haram-O-Tur Nahin

Darshan Singh

chashm-e-bina ho to qaid-e-haram-o-tur nahin

dekhne vaali nigahon se vo mastur nahin

kaun sa ghar hai javan jalvon se pur-nur nahin

ik mire dil ki hi duniya hai jo ma.amur nahin

apni himmat hi se pahunchunga sar-e-manzil-e-shauq

luun sahara main kisi ka mujhe manzur nahin

gham-e-janan ko bhula duun na karun dost ko yaad

itna main ai gham-e-dauran abhi majbur nahin

ye mohabbat ki hai qimat ye mohabbat ka sila

ki hamare hi liye ishq ka dastur nahin

donon aalam ko Dubo de jo mai-o-mina men

chashm-e-saqi ke siva aur ka maqdur nahin

muskura do to mira ghuncha-dil khil jaa.e

dil kabhi khil na sake aisa bhi ranjur nahin

tum nahin paas magar saath hai yadon ka hujum

main akela nahin bekas nahin mahjur nahin

aaj kuchh shaam se tarik hai dil ki mahfil

tum nahin ho to vo raunaq nahin vo nuur nahin

mujh men himmat hai ki main raaz ko ifsha na karun

ye mira zarf hai ye sheva-e-mansur nahin

kar sakega na juda fasla-e-vaqt-o-makan

duur nazron se sahi dil se magar duur nahin

meri taqdir men ‘darshan’ hain kisi ke jalve

shukr sad shukr ki duniya miri be-nur nahin