abrar-ahmad

Ye Rah-e-Ishq Hai Is Rah Pe Gar Jaega Tu

ye rah-e-ishq hai is raah pe gar jaega tu

ek divar khadi hogi jidhar jaega tu

shor-e-duniya ko to sun rang-e-rah-e-yar to dekh

ham jahan khaak udate hain udhar jaega tu

dar-ba-dar hai to kahin ji nahin lagta hoga

vo bhi din aaega thak-har ke ghar jaega tu

azim-e-hijr-e-musalsal hua is mitti se

laut aaega yahin aur kidhar jaega tu

jaan jaega ki manzil nahin maujud kahin

khush-guman hai abhi sargarm-e-safar jaega tu

aarzu rakh use paane ki koi roz abhi

phir yahin bam-e-tamanna se utar jaega tu

ye jo tufan tire gird hai divangi ka

ik zara tez hua aur bikhar jaega tu

karvan rad hua aur chup hui avaz-e-jaras

kya ab us samt ko ta-hadd-e-nazar jaega tu

ab kahan khvab-e-mohabbat ki vo shab duur nahin

jab kahin khak-bhari niind se bhar jaega tu

More Poems

Leave a Comment