Saleem Siddiqui
ḳhvahish-e-taḳht na ab dirham-o-dinar ki guunj
vadi-e-chashm men hai hasrat-e-didar ki guunj
zaḳhm-dar-zaḳhm suḳhan aur bhi hota hai vasi.a
ashk-dar-ashk ubharti hai qalamkar ki guunj
kaash meri bhi sama.at ko Thikana de de
dasht-e-mahshar men tire saya-e-divar ki guunj
ahaTen bhi nahin karte mire a.amal kabhi
ek avaz nihan hai mire kirdar ki guunj
jab bahut ghaur kiya hai to suna.i di hai
muflis-e-shahr ki chup men kisi zardar ki guunj
jis ne sukhi hui miTi se bana.e kuuze
shahr-e-zamzam se uThi hai usi fankar ki guunj
ek muddat se bhaTakti hui phirti hai ‘salim’
kucha-e-dil men mohabbat ke talab-gar ki guunj
Leave a Reply