ahmad-nadeem-qasmi

Lab-E-Khamosh Se Ifsha Hoga

lab-e-khamosh se ifsha hoga

raaz har rang men rusva hoga

dil ke sahra men chali sard hava

abr gulzar pe barsa hoga

tum nahin the to sar-e-bam-e-khayal

yaad ka koi sitara hoga

kis tavaqqoa pe kisi ko dekhen

koi tum se bhi hasin kya hoga

zinat-e-halqa-e-aghosh bano

duur baithoge to charcha hoga

jis bhi fankar ka shahkar ho tum

us ne sadiyon tumhen socha hoga

aaj ki raat bhi tanha hi kati

aaj ke din bhi andhera hoga

kis qadar karb se chatki hai kali

shakh se gul koi tuuta hoga

umr bhar roe faqat is dhun men

raat bhigi to ujala hoga

saari duniya hamen pahchanti hai

koi ham sa bhi na tanha hoga

More Poems

Leave a Comment