Devmani Pandey
ik qatre ko dariya samjha main bhi kaisa pagal huun
har sapne ko sachcha samjha main bhi kaisa pagal huun
beach dilon ke vo duuri thi tai karna asan na tha
ankhon ko ik rasta samjha main bhi kaisa pagal huun
baḌa kiya tha pal-pos kar phir bhi ik din bichhaḌ ga.e
ḳhvabon ko ik bachcha samjha main bhi kaisa pagal huun
kanTe si ḳhud meri shohrat har-pal dil men chubhti hai
fan ko khel-tamasha samjha main bhi kaisa pagal huun
tan par to ujle kapḌe the lekin man ke kaale the
un logon ko achchha samjha main bhi kaisa pagal huun
Leave a Reply