Poet
hain ye saare jite-ji ke vaste
kaun marta hai kisi ke vaste
aadmi sahta hai kya kya zillaten
nafs-e-mardud-e-shaqi ke vaste
ham bhi ja.enge sulaiman tak kabhi
arz karne ik pari ke vaste
dar-ba-dar kuchon men ham bhi phir chuke
ek husn-e-ḳhan.gi ke vaste
kisht-zar-e-zafran se kam nahin
rang-e-zard apna hansi ke vaste
kyuun diye hain tu ne qassam-e-azal
ranj lakhon ek ji ke vaste
do zakat-e-husn kuchh darvesh ko
hain baḌe rutbe saḳhi ke vaste
ik se ik hain ek se le laakh tak
saf-shikan mard-e-jari ke vaste
gham ne is darja kiya dil men hujum
ja nahin hai ḳhurmi ke vaste
aur kya ho yaar ki ankhon se kaam
ḳhulq hain jadugari ke vaste
yaad rakhna shart aur mashrut hai
adamiyat aadmi ke vaste
ranj-o-andoh-o-malal-o-dard-o-gham
sadme hain ye aadmi ke vaste
sabza-e-madfan uga tha kyuun falak
ahuon ki kya chari ke vaste
laḌ ga.e vo ik zara si baat men
pahron ruThe ik ghaḌi ke vaste
ji na ghabra.e tira be-mashghale
ishq kar le dil-lagi ke vaste
kya mujhe paida kiya hai ai ḳhuda
in buton ki bandagi ke vaste
be-kasi mere liye paida hui
main bana huun be-kasi ke vaste
bola murgh-e-nama-bar ko kar ke zabah
ye saza hai elchi ke vaste
dhugdugi men jaan aTki hai miri
haa.e kis champa-kali ke vaste
baryab-e-ḳhalvat-e-mahbub hai
kya sharaf hai arasi ke vaste
marqad-e-tira men kaafi hai mujhe
dagh-e-sauda raushni ke vaste
kijiye har dam abas tan-parvari
ai ajal kis zindagi ke vaste
ḳhama-e-qudrat ne khinchin vo bhaven
rasti ye hai kaji ke vaste
hashr ke din ‘rind’ ko baḳhsha.iyo
ya-ali ruh-e-nabi ke vaste
Leave a Reply