adil-hayat

Nahin Koi Khabar Karna Nahin Hai

nahin koi khabar karna nahin hai

hamen kuchh bhi asar karna nahin hai

bahut hi khubsurat zindagi hai

magar asan basar karna nahin hai

hava ko rasta gar mil bhi jaae

charaghon par asar karna nahin hai

gharaunde hi men apne laut jaun

ki khud ko dar-ba-dar karna nahin hai

hazaron raste to muntazir hain

takhayyul men safar karna nahin hai

lubhate hain nae paude hamen bhi

magar sab ko shajar karna nahin hai

hain ab bhi ishq ki baten gavara

lahu dil ko magar karna nahin hai

agar hai zindagi se pyaar ‘adil’

muhim koi bhi sar karna nahin hai

More Poems

Leave a Comment