Apni to Mohabbat Ki Itni Si Kahani Hai

apnī to mohabbat kī itnī sī kahānī hai

TuuTī hui kashtī hai Thahrā huā paanī hai

ik phuul kitāboñ meñ dam toḌ gayā lekin

kuchh yaad nahīñ aatā ye kis kī nishānī hai

bikhre hue pannoñ se yādeñ sī jhalaktī haiñ

kuchh terī kahānī hai kuchh merī kahānī hai

sāvan kī bahāroñ meñ naġhma haiñ na jhūle haiñ

ākāsh kī āñkhoñ meñ rotā huā paanī hai

chehroñ kī kitāboñ meñ alfāz nahīñ hote

har ek shikan ḳhud meñ ik puurī kahānī hai

chehroñ se to lagtā hai sab bhuul ke baiThe haiñ

ham sirf musāfir haiñ ik raat bitānī hai

maanā ki inheñ ik hī jhoñke ne girāyā hai

har TūTte patte kī apnī hī kahānī hai

Leave a Comment