ashk palkon pe jo aa.en to chhupa.e na bane
TuuT kar bikhren ye moti to uTha.e na bane
qahr hai apne liye soz-e-darun ka aalam
dekhna gar koi chahe to dikha.e na bane
kis tarah haath uTha.un main dua ki ḳhatir
haath ik pal bhi to siine se haTa.e na bane
qissa-e-hasrat-e-dil ham se bayan kya hoga
be-ruḳhi un ki hai aisi ki bata.e na bane
zulm ko zulm samajhta hai kahan vo zalim
hal-e-dil apna sitamgar ko suna.e na bane
kaun si baat thi kya tarz-e-ada thi ‘anjum’
naqsh aisa hua dil par ki miTa.e na bane
Leave a Reply