ham mohabbat ke kharabon ke makin
vaqt ke tul-e-alamnak ke parvarda hain
ek tarik azal nur-e-abad se khali
ham jo sadiyon se chale hain to samajhte hain ki sahil paaya
apni tahzib ki pakobi ka hasil paaya
ham mohabbat ke nihan-khanon men basne vaale
apni pamali ke afsanon pe hansne vaale
ham samajhte hain nishan-e-sar-e-manzil paaya
ham mohabbat ke ke kharabon ke makin
kunj-e-mazi men hain baran-zada taair ki tarah asuda
aur kabhi fitna-e-nagah se Dar kar chaunken
to rahen sidd-e-nigah niind ke bhari parde
ham mohabbat ke kharabon ke makin!
aaise tarik kharabe ki jahan
duur se tez palat jaaen ziya ke aahu
ek bas ek sada gunjti ho
shab-e-alam ki ”yahu! yahu”
ham mohabbat ke kharabon ke makin
reg-e-diroz men khvabon ke shajar bote rahe
saaya napaid tha saae ki tamanna ke tale sote rahe