nibhao ab use jo vaz.a bhi bana li hai
vagarna dahr to ahl-e-vafa se ḳhali hai
harim-e-dil men tiri aarzu ne raushan ki
vo aag jis ne shab-e-zindagi ujali hai
tiri nigah-e-karam hai vagarna ai gham-e-dost
zamana kya tire shaida.iyon se ḳhali hai
sitam hai meri taraf pyaar se nazar na kare
vo but ki jis men mire fan ne jaan Daali hai
baja ki husn ka ehsas hai fareb-e-nazar
magar vo naqsh jo dil men hai kab ḳhayali hai
ufuq se gard chhaTe to ḳhabar mile shayad
sahar tulu hui hai ki hone vaali hai
ab ahl-e-bazm gham-e-tirgi karen to karen
hamare paas to jo sham.a thi jalali hai
hava ke dosh pe uḌti hui ḳhabar to suno
hava ki baat bahut duur jaane vaali hai
Leave a Reply