tujhe rahe na rahe rabt-e-bahami ka ḳhayal
magar mujhe to hai adab-e-dosti ka ḳhayal
taḌap raha tha tiri bazm-e-naz men lekin
kisi ne bhi na kiya meri bebasi ka ḳhayal
pahunch sakega vo kis tarah apni manzil tak
jise zara bhi na ho apni kajravi ka ḳhayal
mujhe yaqin hai pa lega manzilon ke nishan
vo karvan ki na ho jis ko gumrahi ka ḳhayal
milo to dost bano varna sazishen hi karo
ki dosti men na shamil ho dushmani ka ḳhayal
rah-e-hayat men ham to abhi hain nau-amoz
ḳhuda kare ki na paida ho rahbari ka ḳhayal
‘kamal’ jaise jahan honge chand ahl-e-junun
na kar sakega vahan koi ḳhud-sari ka ḳhayal
Leave a Reply