vaqt raste men khaḌa hai ki nahin
dil se ab puchh ḳhuda hai ki nahin
sohbat-e-shisha-garan hai inkar
sang a.ina bana hai ki nahin
har kiran vaqt-e-sahar kahti hai
rauzan-e-dil koi va hai ki nahin
rang har baat men bharne vaalo
qissa kuchh aage baḌha hai ki nahin
zindagi jurm bani jaati hai
jurm ki koi saza hai ki nahin
dost har aib chhupa lete hain
koi dushman bhi tira hai ki nahin
zaḳhm-e-dil manzil-e-jan tak aa.e
sang-e-rah saath chala hai ki nahin
kho ga.e raah ke sannaTe men
ab koi dil ki sada hai ki nahin
ham tarasne lage bu-e-gul ko
kahin gulshan men saba hai ki nahin
hukm-e-hakim hai ki ḳhamosh raho
bolo ab koi gila hai ki nahin
chup to ho jaate hain lekin ‘baqi’
is men bhi apna bhala hai ki nahin
Leave a Reply