Dil Hi Dil Mein Dard Ke Aise Ishaare Ho Gae

Gulzar Dehlvi

dil hi dil men dard ke aise ishare ho ga.e

gham zamane ke sharik-e-gham hamare ho ga.e

jo abhi mahfuz hain tanqid hai un ka shi.ar

haal un ka puchhiye jo be-sahare ho ga.e

bin khile murjha ga.iin kaliyan chaman men kis qadar

zard-ru kis darja haa.e mah-pare ho ga.e

amn ki taqat ko kuchla sach ko rusva kar diya

dushmanon ke char-din men vare-nyare ho ga.e

ye zamana kis qadar bar-e-garan sabit hua

apne begane hue begane pyare ho ga.e

dushman-e-din dushman-e-jan dushman-e-amn-o-sukun

ek do ka zikr kya saare ke saare ho ga.e

Dubne valon se zaa.id kha raha hai un ka gham

jin ko sahil tegh-e-uryan ke kinare ho ga.e

ashk-e-gham men nur-e-rahmat is tarah shamil raha

chand-taron se siva ye chand-tare ho ga.e

haif gulzar-e-jahan men chha ga.i gham ki ghaTa

jo shagufe the chaman men vo sharare ho ga.e