Poet
ashkon se dhul ke a.ina-ḳhana badal gaya
barish hui to mausam-e-rafta badal gaya
jab bhi sambhala chand ne barbad shahr ko
divar-o-dar vahi rahe naqsha badal gaya
ik dasht-e-be-aman men safar kar rahe the ham
sansen ukhaḌ ga.iin kabhi rasta badal gaya
utri nazar se gard to manzar kuchh aur tha
yuun lag raha tha jaise vo chehra badal gaya
har baar pahunche ham tire me.aar tak magar
har baar tera ham se taqaza badal gaya
pahle to intiqam ne shal kar diye havas
phir jaane kya hua ki irada badal gaya
is baar tere harf-e-tasalli na bin sake
is baar teri baat ka lahja badal gaya
kam kam raha tha din ke samay dil men tera aks
shab aa ga.i to jaise ye shisha badal gaya
Leave a Reply