har ek rang har ik ḳhvab ke hisar men tu
ki ansuon ki tarah chashm-e-intizar men tu
udaas raakh se manzar ke ek shahr men main
na.e jahan ki ik sub.h-e-zar-nigar main tu
men itne duur ufuq se pare bhi dekh aaya
mila to jism par bikhre hue ghubar men tu
men zaḳhm zaḳhm ḳhizaon ke biich zinda huun
numu-pazir baharon ke rang-zar men tu
ki tera naam to jalte diyon ki lau men hai
tu bansuri ki har ik taan men pukar men tu
ye rahguzar to tamazat ke shahr ko jaa.e
kahin jale na bahishton ke e’tibar men tu
mujhe bacha le ta.aqub se zard mausam ke
mujhe chhupa le panahon ke sabz ghaar men tu
Leave a Reply