Pandit Vidya Rattan Asi
ghafil huun tiri yaad se aisa to nahin hai
har-vaqt mire dil men tiri yaad makin hai
duniya-e-mohabbat baḌi dilkash hai hasin hai
har ek ko raas aa.e zaruri to nahin hai
maana ki zamane ka har ik naqsh hasin hai
is par bhi zamane men koi tujh sa nahin hai
ik arz-e-tamanna ke siva ham ne kiya kya
kis baat pe vo sho.ala-badan chin-ba-jabin hai
kya ḳhaak ho mere dil-e-betab ka darman
jab tujh pe tiri chashm-e-tavajjoh hi nahin hai
dil men hai magar jazba-e-iḳhlas-o-mohabbat
vo ḳhud hi khinche a.enge ye mera yaqin hai
kya kahiye mohabbat men ajab haal hai apna
nazren hain kahin aur to dil aur kahin hai
rah rah ke khaTakta hai jo har saans men paiham
siine men koi ḳhaar hai ya qalb-e-hazin hai
iqrar-e-vafa kar bhi chukin teri nigahen
afsos tire lab pe magar phir bhi nahin hai
is but ka koi ahd bhi iifa nahin hota
kya is ka yaqin jis ka na iman hai na diin hai
kya turfa-qayamat hai miri vaj.h-e-tabahi
vo puchhte hain aur mujhe yaad nahin hai
sharminda-e-ehsan main nahin rah-numa ka
‘asi’ mira rahbar to mira azm-o-yaqin hai
Leave a Reply