vo ban kar be-zaban lene ko baiThe hain zaban mujh se
ki ḳhud kahte nahin kuchh aur kahlavate hain haan mujh se
bahut kuchh husn-e-zan rakhta hai mera mehrban mujh se
ki tohmat dhar ke hai ḳhvahan-e-ta.id-e-bayan mujh se
kisi gul ki qaba milti nahin tahriq se ḳhali
junun ne le ke banTi hain ye kitni dhajjiyan mujh se
pila saaqi ki rah jaa.e ḳhumar-e-kaif ka parda
bas ab ruktin nahin aati hui angḌa.iyan mujh se
jo gul ko gul na samjhoge to kanTon hi men uljhoge
na do apne ko dhoka aap ho kar bad-guman mujh se
bahut jaldi na kar ai chashm-e-tar kuchh der ko dam le
bayan karna vo tu rah jaa.e jitni dastan mujh se
misal-e-sham.a apni aag men kya aap jal ja.un
qisas-e-ḳhamushi legi kahan tak ai zaban mujh se
huiin ta-der pahchani hui avaz men baten
vo kuchh kuchh khul chale hain rakh ke parda darmiyan mujh se
tasavvur ki nazar pardon ke roke ruk nahin sakti
bata o jaane vaale chhup ke ja.ega kahan mujh se
agar ai ‘arzu’ har saans dil ki aah ban jaa.e
na hogi ḳhatm phir bhi meri lambi dastan mujh se
Leave a Reply