Mohabbat Mein Aaram Sab Chahte Hain

mohabbat men aram sab chahte hain

magar hazrat-e-‘dagh’ kab chahte hain

khata kya hai un ki jo us but ko chaha

khuda chahta hai to sab chahte hain

vahi un ka matlub o mahbub thahra

baja hai jo us ki talab chahte hain

magar alam-e-yas men tang aa kar

ye saman-e-afat ajab chahte hain

ajal ki dua har ghadi mangte hain

gham-o-dard-o-ranj-o-taab chahte hain

na tafrih-e-asaish-e-dil ki khvahish

na saman-e-aish-o-tarab chahte hain

qayamat bapa ho nuzul-e-bala ho

yahi aj-kal roz o shab chahte hain

na mashuq-e-farkhar se un ko matlab

na ye jam-e-bintul-inab chahte hain

na jannat ki hasrat na huron ki parva

na koi khushi ka sabab chahte hain

nirali tamanna hai ahl-e-karam se

sitam chahte hain ghazab chahte hain

na ho koi agah raz-e-nihan se

khamoshi ko ye mohr-e-lab chahte hain

khuda un ki chahat se mahfuz rakkhe

ye azar bhi muntakhab chahte hain

gham-e-ishq men ‘dagh’ majbur ho kar

kabhi jo na chaha vo ab chahte hain

Leave a Comment