mere hone se pahunch ja.ega aram ke saath
nama-bar mujh ko bhi le chal mire paigham ke saath
vo jo divana sa galiyon men phira karta hai
yaad karte hain vo mujh ko magar ilzam ke saath
yuun nazar ka hua Takrao ki tauba tauba
hosh bhi ho gaya ruḳhsat dil-e-nakam ke saath
kis liye apne muqaddar pe mujhe faḳhr na ho
un ka divana likha ho jo mire naam ke saath
ai ‘hayat’ un ki nigahon ke tabassum pe nisar
zindagi aur na guzregi ab aram ke saath
Leave a Reply