mujh ko shikastagi ka qalaq der tak raha
kyuun chehra phir janab ka faq der tak raha
yuun to ka.i kitaben paḌhin zehn men magar
mahfuz ek saada varaq der tak raha
aksar shab-e-visal tire ruThne ke baad
ehsas par tilism-e-ramaq der tak raha
ab hai kitab-e-ishq men jo saada o salis
pahle vo lafz lafz-e-adaq der tak raha
suraj ke sar ko shaam ke neze pe dekh kar
dast-e-zamin pe rang-e-shafaq der tak raha
us ka javab ek hi lamhe men ḳhatm tha
phir bhi mire saval ka haq der tak raha
‘bekal’ jise bhula ke zamana hai mutma.in
tujh ko hi yaad vo bhi sabaq der tak raha
Leave a Reply