tanha.i ke lamhat ka ehsas hua hai
jab taron bhari raat ka ehsas hua hai
kuchh ḳhud bhi huun main ishq men afsurda o ghamgin
kuchh talḳhi-e-halat ka ehsas hua hai
kya dekhiye un tira-nasibon ka ho anjam
din men bhi jinhen raat ka ehsas hua hai
vo zulm bhi ab zulm ki had tak nahin karte
aḳhir unhen kis baat ka ehsas hua hai
bazi-gah-e-alam men to ik khel hai jiina
is khel men kab maat ka ehsas hua hai
ruḳh par tire bikhri hui zulfon ka ye aalam
din ka to kabhi raat ka ehsas hua hai
kuchh ḳhud bhi vo nadim hain ‘nasim’ apni jafa par
kuchh meri shikayat ka ehsas hua hai
Leave a Reply