Hawas Gulzar Ki Misl-E-Anadil Hum Bhi Rakhte The

havas gulzar ki misl-e-anadil ham bhi rakhte the

kabhi tha shauq-e-gul ham ko kabhi dil ham bhi rakhte the

qaza bhi tere hathon chahte the tujh ko kya kiije

nahin to tegh-e-dam ke saath qatil ham bhi rakhte the

khata-e-ishq par ham par na itna bhi sitam Dhaao

agar chaha to chaha kya hua dil ham bhi rakhte the

khuda ko ilm hai zinda hai ya jal-bhun gaya shab ko

dil apna tere parvanon men shamil ham bhi rakhte the

miri jan-baziyon par gor men rustam ye kahta hai

na the aise jari go sher ka dil ham bhi rakhte the

ilaqa ishq ka lete ye soche honge barbadi

vagarna naqd-e-jan o sikka-e-dil ham bhi rakhte the

khuda ke samne hogi jo pursish ishq-bazon ki

kahenge ham bhi itna ishq-e-kamil ham bhi rakhte the

tamanna thi hamen bhi teri sohbat dekh lene ki

ki parvane the shauq-o-zauq-e-mahfil ham bhi rakhte the

bade uqda-kusha the tum to hal is ko bhi karna tha

muhimm-e-ishq sar karne ki mushkil ham bhi rakhte the

talash-e-yar men khufiya gae ushshaq duniya se

khabar bhi ki na ham ko shauq-e-manzil ham bhi rakhte the

koi lahza judai men tadapne se na fursat thi

kabhi pahlu men dil manind-e-bismil ham bhi rakhte the

junun ka zor tha dil men jagah kar li thi vahshat ne

gharaz pesh-e-nazar laila o mahmil ham bhi rakhte the

jagah dil ki tarah pahlu men di hoti hamen tum ne

liyaqat is sar-afrazi ke qabil ham bhi rakhte the

use kyunkar na kahte ham ki yakta hai khudai men

shanasa the tamiz-e-haqq-o-batil ham bhi rakhte the

khuda ne jaan chhudvai ‘sharaf’ vo khud bigad baitha

haqiqat men ajab maashuq-e-jahil ham bhi rakhte the

Leave a Comment