Ghar Darwaze Se Duri Par Sat Samundar Bich

Ayub Khawar

ghar darvaze se duuri par saat samundar biich

ek anjane dushman ki hai ghaat samundar biich

phir ye harne vaali ankhen jagin is dhoke men

koi ḳhvab bhanvar men aaya raat samundar biich

ab kya unche badban par ḳhvab sitara chamke

ankhen rah ga.iin sahil par aur haat samundar biich

is mausam men kaun kahan tak diya jala.e rakkhe

hava chale to Daal se TuuTe paat samundar biich

lahr se lahr mile to dekho qatre ki tanha.i

dil aisi ik buund ki kya auqat samundar biich

ek kahani soch rahi hai mujh ko kaun kahe

ek jazira Duub raha hai zaat samundar biich

ek safar patvar ka apna ek safar paani ka

aur musafir tanha kha gaya maat samundar biich