Bahadur Shah Zafar
kafir tujhe allah ne surat to pari di
par haif tire dil men mohabbat na zari di
di tu ne mujhe saltanat-e-bahr-o-bar ai ishq
honton ko jo khushki miri ankhon ko tari di
khal-e-lab-e-shirin ka diya bosa kab us ne
ik chaat lagane ko mire nishkari di
kafir tire sauda-e-sar-e-zulf ne mujh ko
kya kya na pareshani o ashufta-sari di
mehnat se hai azmat ki zamane men nagin ko
be-kavish-e-sina na kabhi namvari di
sayyad ne di rukhsat-e-parvaz par afsos
tu ne na ijazat mujhe be-bal-o-pari di
kahta tira kuchh sokhta-jan lek ajal ne
fursat na use misl-e-charagh-e-sahari di
qassam-e-azal ne na rakha ham ko bhi mahrum
garche na diya koi hunar be-hunari di
us chashm men hai surme ka dumbala pur-ashob
kyuun haath men badmast ke banduq bhari di
dil de ke kiya ham ne tiri zulf ka sauda
ik aap bala apne liye mol kharidi
saaqi ne diya kya mujhe ik saghar-e-sarshar
goya ki do aalam se ‘zafar’ be-khabari di
Leave a Reply