Waseem Barelvi
ye hai to sab ke liye ho ye zid hamari hai
is ek baat pe duniya se jang jaari hai
uḌaan vaalo uḌanon pe vaqt bhari hai
paron ki ab ke nahin hauslon ki baari hai
main qatra ho ke bhi tufan se jang leta huun
mujhe bachana samundar ki zimmedari hai
isi se jalte hain sahra-e-arzu men charagh
ye tishnagi to mujhe zindagi se pyari hai
koi bata.e ye us ke ghurur-e-beja ko
vo jang main ne laḌi hi nahin jo haari hai
har ek saans pe pahra hai be-yaqini ka
ye zindagi to nahin maut ki savari hai
dua karo ki salamat rahe miri himmat
ye ik charagh ka.i andhiyon pe bhari hai
Leave a Reply