rida.en chalen ḳhak-danon ki janib
vafa.en khule sar dukanon ki janib
tire har sitam par yunhi be-irada
nazar uTh ga.i asmanon ki janib
ajab hai ye kar-e-suḳhan sher-goi
dhakele hai ratbul-lisanon ki janib
nazar sarsara.i badan par yuun mere
baḌhe saanp jaise ḳhazanon ki janib
mira ishq kahta hai mujh se ki aa ja
tujhe le chalun main uḌanon ki janib
abhi tifl-e-maktab huun aur na-ahl bhi
kidhar le chale imtihanon ki janib
shab-e-tar kachcha ghaḌa ek dariya
main baḌhne lagi dastanon ki janib
to malbe se mere hi ta.amir hoga
gira ke mujhe baḌh makanon ki janib
meri raah chunna ki ab main ravan huun
vafaon ke raushan nishanon ki janib
ye nad-e-ali ka ajab mo.ajiza tha
sabhi tiir palTe kamanon ki janib
Leave a Reply