aise jazbat men lahje ko na patthar kiije
guftugu mujh se zara aap sambhal kar kiije
ye na ho aap ki tahrir hi baghi ho jaa.e
zulm itna bhi na qirtas-o-qalam par kiije
mujh se ranjish hai to maidan men aa ja.iye aap
meri tasvir ke TukḌe na bahattar kiije
mera da.ava hai ki halat badal ja.enge
samna aap jo halat ka DaT kar kiije
chahte aap hain jo zehn kushada rakhna
bughz-o-nafrat ke ḳhayalat ko bahar kiije
dusron par to karam aap ka rahta hai magar
ik nazar meri bhi janib mire dilbar kiije
baat banti hai mohabbat se bhi aksar ‘rahbar’
dil men paivast na alfaz ke nashtar kiije
Leave a Reply