Poet
koi vajud hai duniya men koi parchha.in
so har koi nahin hota kisi ki parchha.in
mire vajud ko maano to saath chalta huun
ki main to ban na sakunga tumhari parchha.in
yahi charagh hai sab kuchh ki dil kahen jis ko
agar ye bujh gaya to aadmi bhi parchha.in
ka.i dinon se mire saath saath chalti hai
koi udaas si ThanDi si koi parchha.in
main apna-ap samajhta raha jise ta-umr
vo mere jaisa hayula tha meri parchha.in
na ḳhush ho koi bhi tezi se baḌhti qamat par
pas-e-ghurub na hogi bichari parchha.in
guman-e-hast hai hasti ka a.ina-ḳhana
so apne-ap ko bhi jaan apni parchha.in
main nisf sach ki tarah huun bhi aur nahin bhi huun
ki aadha jism hai mera to aadhi parchha.in
phir us se us ke taghaful ka kya gila karna
ki ‘iftiḳhar-mughal’ vo to thi hi parchha.in
Leave a Reply