is iltifat par koi daman na thaam le
hai maslahat yahi ki taghaful se kaam le
kuchh der ki ḳhushi se to behtar hai gham mujhe
meri taraf na dekh na mera salam le
main bhi to teri bazm men aaya huun der se
ab tu bhi mujh se ho ke ḳhafa intiqam le
ji bhar ke pahle apni nazar se pila mujhe
varna ye mai-kada le surahi le jaam le
meri nigah-e-shauq pe phir kijiyo nazar
pahle zara ḳhud apne kaleje ko thaam le
mahfil men sab ke samne dad-e-ghazal na de
yuun dil hi dil men shauq se lutf-e-kalam le
jis ne kabhi ḳhulus bhi manga na ho tira
is ahl-e-dil ka naam ba-sad-ehtiram le
jiine na denge dekhne vaale kabhi hamen
achchha ye hai ki jabr-e-mohabbat se kaam le
hai dekhna hi meri taraf to ba-ehtiyat
mahfil men pahle ja.eza-e-ḳhas-o-am le
tera huun aur tera rahunga tamam umr
lekin mire liye na koi ittiham le
milna nasib men hai to mil ja.enge kabhi
jan-e-‘shamim’ sabr-o-tahammul se kaam le
Leave a Reply