hava men phirte ho kya hirs aur hava ke liye
ghurur chhod do ai ghafilo khuda ke liye
gira diya hai hamen kis ne chah-e-ulfat men
ham aap duube kisi apne ashna ke liye
jahan men chahiye aivan o qasr shahon ko
ye ek gumbad-e-gardun hai bas gada ke liye
vo aina hai ki jis ko hai hajat-e-simab
ik iztirab hai kaafi dil-e-safa ke liye
tapish se dil ka ho kya jaane siine men kya haal
jo tere tiir ka rauzan na ho hava ke liye
tabib-e-ishq ki dukkan men dhundte phirte
ye dardmand-e-mohabbat tiri dava ke liye
jo haath aae ‘zafar’ khak-pa-e-‘fakhruddin’
to main rakhun use ankhon ke tutiya ke liye
Leave a Reply