Naqab-E-Bazm-E-Tasawwur uThai Jati Hai

Laxmi Narayan Farigh

naqab-e-bazm-e-tasavvur uTha.i jaati hai

shikast-ḳhurdon ki himmat baḌha.i jaati hai

bhaTakne lagta hai rah-e-vafa se jab aalam

hadis-e-ishq hamari suna.i jaati hai

mata-e-hosh-o-ḳhirad be-baha sahi lekin

dar-e-habib pe ye bhi luTa.i jaati hai

nazar se hoti hai lutf-o-karam ki barish bhi

nazar se barq-e-tapan bhi gira.i jaati hai

vufur-e-shauq ki dekho to maslahat-koshi

junun ki baat ḳhirad se chhupa.i jaati hai

kis e’timad se aghaz-e-daur-e-ulfat men

ḳhayal-o-ḳhvab ki duniya basa.i jaati hai

faza-e-ruh pe tarikiyan musallat hain

haram men sham-e-aqidat jala.i jaati hai

dikha dikha ke ma.al-e-junun ki fitnagari

bashar ko rasm-e-muravvat sikha.i jaati hai

mata-e-ishq-o-mohabbat nigah-e-alam se

kis ehtiyat se ‘farigh’ chhupa.i jaati hai