abhi to mausam-e-na-ḳhush-gavar aa.ega
phir is ke ba.ad payam-e-bahar aa.ega
ḳhulus-e-ahd-e-vafa sazgar aa.ega
kabhi to marhala-e-e’tibar aa.ega
jis anjuman men dilon ke qarar luTte hain
us anjuman men pahunch kar qarar aa.ega
lab-e-shagufta-o-mai-pash par shagufon par
karoge ghaur jahan tak nikhar aa.ega
yahi hai bazm-e-tarab-afrin to jaata huun
ye chara-gar ne kaha tha qarar aa.ega
saval-e-besh-o-kam-e-mai nahin magar saaqi
kabhi tujhe bhi shu.ur-e-shumar aa.ega
pukarne pe jab aaya to tera divana
kisi bhi naam se tujh ko pukar aa.ega
nisar-e-husn-e-mohabbat rahi hai dekhoge
kali ke saath hi shaḳhon pe ḳhaar aa.ega
jo hai mizaj-e-bahar-e-chaman se na-vaqif
bara-e-sair-e-chaman baar baar aa.ega
jinhen qayas-o-shavahid se vasta hai unhen
yaqin-e-gardish-e-lail-o-nahar aa.ega
ye puḳhta-kar taghazzul ḳhayal ke bal par
ghazal ke shar-e-qafas men guzar aa.ega
Leave a Reply