Shamim Karhani
anmol sahi nayab sahi be-dam-o-diram bik jaate hain
bas pyaar hamari qimat hai mil jaa.e to ham bik jaate hain
sikkon ki chamak pe girte hue dekha hai shaiḳh o barhaman ko
phir mere khanDar ki qimat kya jab dair o haram bik jaate hain
kya sharm-e-ḳhudi kya pas-e-haya ghurbat ki andheri raton men
kitne hi butan-e-zohra-jabin ba-dida-e-nam bik jaate hain
ye hirs-o-hava ki manzil hai ai rah-ravo hushyar zara
jab haath rupahle baḌhte hain rahbar ke qadam bik jaate hain
vo sahib-e-ilm-o-hikmat hon ya paikar-e-aql-o-dana.i
ik mere dil-e-nadan ke siva sab teri qasam bik jaate hain
ye shahr hai shahr-e-zardari kya hoga ‘shamim’ anjam tira
yaan zehn ḳharida jaata hai yaan ahl-e-qalam bik jaate hain
Leave a Reply