Syed Amin Ashraf
dalil-e-kun hai magar dard-e-la-dava nikli
ye ka.enat ajab hairat-azma nikli
ye maana sach hai koi gham sada nahin rahta
ḳhushi mili thi to vo bhi gurez-pa nikli
hava ki tarah se uḌ ja.unga jahan bhi rahun
pa.e ḳhabar qafas-e-rang se sada nikli
kahan se aa.i hava is ujaaḌ manzar men
jo ghar se nikli to vo bhi shikasta-pa nikli
vo nim-shab vo ruḳh-e-mahtab-o-abr-e-siyah
shikastagi thi ki chashm-e-falak-numa nikli
vo mauj-e-mai thi jo chamka ga.i udasi ko
kisi ki ḳhanda-labi bu-e-ashna nikli
haya ke saath taqaza-e-qahr-o-mahar bhi hai
tiri nazar se tabi.at miri juda nikli
Leave a Reply