Tashna Azmi
lazzat-e-ulfat se dil masrur hona chahiye
jo bhi hai shikva-gila sab duur hona chahiye
dekh kar hal-e-pareshan log sau baten karen
pyaar men itna nahin majbur hona chahiye
husn ab had se ziyada naaz dikhlane laga
ishq tujh ko bhi zara maghrur hona chahiye
la.al-o-gauhar ke evaz patthar bhi bik jaa.e yahan
bechne vaala faqat mash.hur hona chahiye
dekhte hi log ham ko banda-e-momin kahen
is qadar chehre pe apne nuur hona chahiye
aaj bhi adhe-adhure ham se ‘tashna’ log hain
aap ka kuchh to karam bharpur hona chahiye
Leave a Reply