Shamim Karhani
agarche ishq men ik be-ḳhudi si rahti hai
magar vo niind bhi jaagi hui si rahti hai
vahi to vaj.h-e-ta.aruf hai koi kya jaane
ada ada men jo ik be-ruḳhi si rahti hai
baḌi ajiib hai shab-ha-e-gham ki zulmat bhi
diye jalao magar tirgi si rahti hai
hazar dard-e-fara.ez hain aur dil-e-tanha
mire ḳhulus ko sharmindagi si rahti hai
‘shamim’ ḳhun-e-jigar se ubhariye lekin
har ek naqsh men koi kami si rahti hai
Leave a Reply