Sufi
kaash hoti vafa zamane men
par haqiqat kahan fasane men
log auqat bhuul jaate hain
dusron ka mazaq udane men
sochta huun kabhi kabhi yuun hi
harj kya tha use manane men
ham pade hain dayar-e-ghair men yuun
jaise lashen hon sard khane men
kya kahen ik adhure qisse ko
lag gai umr kyon bhulane men
roz hi saans phuul jaati hai
zindagani ke naaz uthane men
haif bheja gaya huun main ‘shakir’
itifaqan ghalat zamane men
Leave a Reply