suno ye gham ki siyah raat jaane vaali hai
abhi azaan ki avaz aane vaali hai
tujhe yaqin to shayad na aa.ega lekin
ye sub.h koi karishma dikhane vaali hai
kise ḳhabar hai ki andhi chala.e peḌ gira.e
yahi hava jo patangen uḌane vaali hai
sameT bikhre hue kaghzat ko apne
koi sada tujhe vapas bulane vaali hai
tujhe bhi zulm se fursat na mil sakegi kabhi
miri ana bhi kahan sar jhukane vaali hai
miri ghazal pe na.e log kyuun taḌapte hain
miri ghazal to purane zamane vaali hai
Leave a Reply