Siraj Faisal Khan
hamin vafaon se rahte the be-yaqin bahut
dil-o-nigah men aa.e the mah-jabin bahut
vo ek shaḳhs jo dikhne men Thik-Thak sa tha
bichhaḌ raha tha to lagne laga hasin bahut
tu ja raha tha bichhaḌ ke to har qadam pe tire
phisal rahi thi mire paanv se zamin bahut
vo jis men bichhḌe hue dil lipaT ke rote hain
main dekhta huun kisi film ka vo scene bahut
tire ḳhayal bhi dil se nahin guzarte ab
isi mazar pe aate the za.erin bahut
taḌap taḌap ke jahan main ne jaan di hai ‘siraj’
khaḌe hue the vahin par tamashbin bahut
Leave a Reply