gorakh-dhandha ho ja.un kyaa?
main bhi tum sa ho ja.un kyaa?
ghazlon ki basti suuni hai
phir avara ho ja.un kyaa?
sach ka girvi chhuḌvana hai
thoḌa jhuTa ho ja.un kyaa?
savan ne aansu se puchha
main bhi khara ho ja.un kyaa?
sab ummiden Duub rahi hain
tinka tinka ho ja.un kyaa?
ghar daftar ke baTvare men
aadha aadha ho ja.un kyaa?
manDi ab bas uThne ko hai
thoḌa sasta ho ja.un kyaa?
sab ka ho kar dekh chuka huun
vapas ḳhud ka ho ja.un kyaa?
Leave a Reply