Poet
ḳhalvat hui hai anjuman-ara kabhi kabhi
ḳhamoshiyon ne ham ko pukara kabhi kabhi
le de ke ek saya-e-divar-e-arzu
deta hai rahravon ko sahara kabhi kabhi
kis darja dil-fareb hain jhonke umiid ke
ye zindagi hui hai gavara kabhi kabhi
saunpa hai ham ne jis ko har ik lamha-e-hayat
ai kaash ho sake vo hamara kabhi kabhi
ai mauj-e-ḳhush-ḳhiram zara tez tez chal
banti hai sat.h-e-ab kinara kabhi kabhi
dast-e-tahi baḌha.iye kis ishtiyaq se
TuuTa hai shaḳh-e-shab se jo taara kabhi kabhi
hadd-e-nazar ke paar ‘tamanna.i’ kaun hai
mahsus ho raha hai ishara kabhi kabhi
Leave a Reply