Nasir Shahzad
paran piritam pe vaar kar dekho
sar se gaThri utaar kar dekho
vo yam-e-zat ho ki rud-e-furat
koi dariya to paar kar dekho
puus ki os se badan dho kar
maas ko mushk-bar kar dekho
mushk tha mu-burida hathon se
sar ko kandhon pe baar kar dekho
suno jangal men panchhiyon ki sada
bahte dariya se pyaar kar dekho
oḌh kar tan pe tishnagi ki rida
man ko mohan ke dvaar kar dekho
ho ke miTTi miTo sajan ke liye
mar ke marqad nikhar kar dekho
utro bachpan ke nardban se phir
ban men chiḌiyon ko maar kar dekho
karbala ke jari jiyale log
ḳhud ko un men shumar kar dekho
ma.arifat kya hai jaan jaoge
is pe tan man nisar kar dekho
lab pe avaz-e-haq rahe qaa.em
jang jiito ki haar kar dekho
qayas ban-bas sab saphal honge
saada ko sudh singhar kar dekho
mango shabbir ki shanasa.i
gham pe mat inhisar kar dekho
Leave a Reply